feteas

Una vegada más, l´Agrupación Artísticu Cultural Padre Coll presenta una obra del autor Fernando Valle Campal.

Dempués d´anteriores ésitos como “¿Adoptamos? o “L’espectru” y fiel al so estilu, Fernando Valle Campal somórguianos n´una nueva comedia cola qu´ufierta pincelaes de reflexón, sofitándose na típica guerra de sexos ente matrimonios.

Si´l públicu va ver la función cola idea de prestase va consiguilo, pero..., ¡curiáu!, puede vese reflexáu en dalgún de los personaxes.

Chefa y Clotilde son hermanes y tán n´estáu de bona esperanza. Les dos tán tremendamente ilusionaes pero…, l´embaranzu tien les sos coses…, vultures, fories, pesadez… Para cuelmu de males, los sos homes Xuan Y Pin, nun collaboren en nada y pásense el día protestando.

Pero esta situación va camudar porque Remedios, muyer  d´armes tomar y madre de Chefa y Clotilde, entama dar una llección a los sos xenros, quier que sufran nes sos carnes los inconvenientes del embaranzu tal que lu soporten les sos fíes.

Y cuando a Remedios métese-y una cosa na cabeza, llévalo p’adelantre…, d’una forma o otra.

Asina que cola ayuda del so home, Bartolo, y el bruxu local, prepara un ciscu tan grande, qu´hasta la televisión vien interesase de lo que ta pasando.