feteas

LA EXPOSICIÓN VIAJERA DE LA COMPAÑÍA

Esti añu 2016, cúmplense 30 años de la creación de l’Asociación Cultural Compañía Asturiana de Comedias, que tien como finalidá l’espardimientu y l’estudiu del Teatru Popular y Costumista Asturianu y que, nestos años, representó los sos montaxes teatrales n’escenaries de toa Asturies y de fuera la comunidá, recibiendo’l reconocimientu pola so llabor escénica n’abondos certámenes teatrales y l’afayamientu’l públicu y les instituciones munches veces, valiendo d’exemplu la “Medalla Plata del Ayuntamientu de Xixón”, qu’algamó l’añu 2010.

La asociación actual ye heredera d’una tradición teatral que se remonta a les primeres décades del sieglu XX, colos intentos de creyación d’un Teatru Popular Asturianu de figures de renome na cultura xixonesa y asturiana, como “Pachín de Melás”, José Manuel Rodríguez o Eladio Verde. Intentos que s’acolumbraron na creación de grupos estables de teatro profesional denominaos, xenéricamente, “Compañíes Asturianes” y que supunxeron l’ésitu d’unos modelos teatrales vixentes tovía nel ideariu popular asturianu, que cristalizaron nesi xéneru que, anguaño, conózse col nome de “Teatro Costumista Asturianu”.

La Compañía Asturiana de Comedies actual, dirixía como grupu teatral y presidía como asociación por Eladio Sánchez, garra’l testigu de la primera Compañía Asturiana d’Isidro Carballido de 1920 y de les sos continuadores durante’l sieglu XX, al poner enriba les tables aquellos tipos, aquelles trames y aquelles tradiciones que caltienen viva una esencia tan asturiana.

Esta esposición COMPAÑÍA ASTURIANA. 100 AÑOS DE TEATRO ASTURIANO quier dar a conocer a la sociedá asturiana’l trabayu de l’Asociación Cultural Compañía Asturiana de Comedias durante estos trenta años, ufriendo una visión xeneral de la historia del Teatru Popular Asturianu, protagonizada polos cien años d’actividá de les distintes “Compañíes Asturianes”.

SERGIO BUELGA

compartir: