COMPAÑIA ASTURIANA DE COMEDIAS .¡A la romana! de Sergio Buelga

Los habitandes d’una aldea pequeña asturiana de tres cases xuntiquines saben que la so vida nun ye xusta y, mientres a unos-yos va estupendamente, otros aguántense o amárguense, viendo como pasa la vida ensin que nunca pase nada pa qu’esto cambie. Pero hai ocasiones en que, nun mesmu momentu, concéntrase l’universu y la vida españa, cambiando pa siempre. Y esi españíu va llega-yos la mañana del domingu 22 de febreru de 1981, más o menos a les diez de la mañana. Porque’l vecín agarráu va alcontrar perres, el bonal va vese obligáu a mentir, la paciente va rebelase, al mimáu van nega-y coses, la xenerosa va pensar en sigo mesma, la recta va tener qu’abrir los güeyos, el repunante va tener que tragar… Y les muyeres sabies a les que naide tien en cuenta nunca, por fin, van poder faer xusticia ¡a la romana!

Los romanos representaben a la diosa Xusticia con una balanza de dos brazos, simbolizando que se teníen en cuenta toles partes. Pero, nel so día a día, usaben la romana de brazos desiguales, que dependía más del dueñu del deu que facía correr el contrapesu nel brazu llargu que del pesu real de lo que colgaba del pequeñu. Eso, bien lo sabía Plauto, el gran comediógrafu romanu, que nos dexó una refilera d’obres con otra refilera más llarga de personaxes qu’entendíen que la xusticia solamente yera la que-yos beneficiaba a ellos.

Con esta obra, la Compañía Asturiana de Comedies viaxa hasta los sos oríxenes de la comedia pa traelos hasta una realidá más cercana, faciendo que los antiguos personaxes falen, se vistan, reaccionen y sientan como asturianos y les situaciones, ensin perder la so esencia, se tresformen n’aquelles que sentimos como propies, que nos faen rir, reaccionar y emocionar.

Esperamos que-yos preste esta caxigalina pláutica, ¡A la romana!